Шинэ жил ойртсоор...

Цалин мөнгөн тэнгэртээ
Цасан угалз наадуулсан
Цагаан торгон өмсгөлдөө
Цацаг чимгээ сагсуулсан.....


Энэ дуутай зэрэгцээд л урт цагаан сахалтай, гялалзсан цэнхэр нөмрөгтэй, өвлийн өвгөн аав уут дүүрэн бэлэг үүрсээр орж ирэхэд хичнээн их догдолдог байсан гээч, хэзээ миний нэрийг дуудах бол гээд л анхааралтай нь аргагүй сонсдог байсансан. Цагаан даашинзтай, саа гялалзуулан, өвөөтэй хамт орж ирсэн ганган охидыг хараад бас тэрүүхэндээ атаархан зогсоно. Сүүлд өөрөө тийм гоё даашинз өмсөж, ээжийн оёж өгсөн гялалздаг нөмрөгийг нөмрөөд, цагаан сахалт өвөөтэй хамт орж ирэхдээ атаархангуй харах охидын өмнөөс бахархалтай нь аргагүй инээмсэглэж билээ... Нүд гялбуулам өнгө өнгийн гэрэл анивчуулсан сүрлэг ногоон гацуур эрээн авдарны дэргэд дүнхийнэ. Цаанаа л нэг үлгэрийн юм шиг, өлгөсөн тоглоомнууд нь хүртэл инээмсэглэх мэт санагдна. Цасан өвгөн, улаан хацартай охин, цагаан хувцастай цэрэг, ягаан хатан, хөөрхөн ногоон зараа, миний хамгийн дуртай тоглоомнууд.. Ухаан орсон цагаасаа эхлэн сургуульд явах хүртлээ жил бүр тэдэнтэйгээ уулзаж, нандин хүслээ шивнэж, зүүдэндээ үлгэрийн орноор хамтдаа аялдаг байсансан... Жил бүрийн 31-ний өдөр автобусанд суугаад гэрийн зүг догдлон яарахдаа байн байн утсаар ярьж, гэр бүлийнхнийхээ баяртаа бэлдэн хөөрөн сандралдахыг сонсоод улам л яарч, автобус хэтэрхий удаа явах мэт санагдна. Баярын оргилуун дарс, ганган чимэглэлтэй бялуу, шөнийн тэнгэрийг үзэсгэлэнтэйгээр гэрэлтүүлэх салют, ээжийн минь бэлдсэн хорвоогийн хамгийн амттай хоол, ингээд ерөнхийлөгчийн үг хэлэх мөч, миний аавын ерөөлийн үг, дотроо шивнэх нандин хүсэлтэй минь хамт шинэ он ирдэгсэн.. Миний, магадгүй хүн бүрийн хамгийн их хүсэн хүлээдэг баяр байх. Цагаан сахалтай өвөө, гоё даашинзтай охид, сүрлэг гацуур, ягаан хатан, миний гэр бүлийн халуун дулаан уур амьсгал... Энэ бүхэнгүйгээр шинэ жилийг төсөөлөхийн аргагүй. Ойртох тусам нь догдлон хүлээнэ. Шинэ жил ойртсоор л...